放暑假好多港人外遊，日本係當然目標之一，其中一個原因係日圓下跌，不過，最近日本正研究提升最低工資，雖然唔會令港人喺當地嘅消費大增，但都有輕微影響。
日本生活水準高，但原來當地最低工資唔算高，喺經合組織（OECD）成員當中，只算排中游，高西班牙少少，時薪係七百八十日圓，喺當地只夠食碗拉麵。但當地厚生勞動省呢排建議，將今年度最低工資加到七百九十八日圓。若然成事，加多呢百分之二點三，每小時嘅人工就多咗十八日圓，咁柯打拉麵時，可以加隻蛋，或加塊叉燒。
唔好睇小呢十八日圓，小數怕長計，每年即係額外多咗三萬幾日圓，相當於一般家庭去超市買兩星期嘢嘅錢。講開又講，日本嘅最低工資七百八十日圓，計番港銀都有成四十八蚊，比香港嘅最低時薪高一截，唔怪得有人話，香港三十二個半最低時薪，買碗拉麵都唔夠。
第一手消息請下載on.cc東網
