何俊賢（左二）同陳恒鑌（右二）整色整水搞宣傳騷。
政府將會喺今個月推出全城清潔運動，由政務司司長林鄭月娥任「清潔大隊長」。立法會議員何俊賢（高佬賢）同陳恒鑌（Ben）尋日搶先行動，擺新造型現身街頭。
高佬賢同阿Ben兩個尋日以人氣卡通角色現身，扮演總司令喺荃灣區進行清潔宣傳騷，兩人仲係威係勢咁拎住支扮清潔劑同漂白水嘅水槍，話要射低晒啲菌喎！不過，佢哋嗰支清潔兵團純粹宣傳，連垃圾蟲都係紙板，搞笑嘅係阿Ben發言時，扮晒幽默咁話，有位神秘嘉賓會壓軸出場，大家引頸以待喇，原來係食物及衞生局局長高永文嘅紙板公仔人，真係畀佢吹脹。
第一手消息請下載on.cc東網
