設計圖片及對白
政改方案被否決，政制原地踏步，但唔代表本港政壇會平靜，事關各黨派都要備戰今、明兩年幾場選舉。公民黨（公文袋）黨魁、立法會議員梁家傑（袋巾傑）之前放風話下屆立法會選舉要年輕化，有意退下來。由於該黨規定黨魁要係立法會議員，所以袋巾傑唔再選嘅話，就要另覓黨魁。不過，公文袋一向內部矛盾嚴重，四分五裂，甚至青黃不接，黨魁隨時後繼無人。
如果袋巾傑真係唔參選明年立法會，公文袋就要先搵定人接替佢嘅九龍東議席，再諗埋由邊個接棒做黨魁。假設公文袋主席余若薇唔選明年立法會，按理就好大機會由曾任公文袋主席嘅現任議員陳家洛做黨魁。但陳家洛同該黨議員毛孟靜（阿毛）不咬弦已經係公開秘密，聞說阿毛仲揚言，如果陳家洛做黨魁，佢就退黨喎。
雖然阿毛一向獨來獨往，仲同非黨友新民主同盟議員范國威搞咗個「香港本土」，但阿毛亦因此得到一啲本土派嘅支持。袋巾傑早前先提倡公文袋都要將本土主流化，甚至要將本土論述加入黨綱，如果任由阿毛退黨，或會流失部分本土派支持者。但如由阿毛任黨魁，以佢嘅人緣隨時爆更大嘅退黨潮。至於該黨現屆其他議員就算順利連任，要任黨魁亦恐未成氣候。
似乎公文袋左揀右揀都係得個爛燈盞，袋巾傑就分分鐘因為冇人接班而要做多一屆。如果係咁就難為當初由東涌轉戰九龍東嘅飛機師黨員譚文豪Jeremy喇。事關佢今屆立會同去年東涌區會選舉，曾分別讓路畀郭家麒同黨友余俊翔，如果出年再要Jeremy讓路，恐怕到佢話退黨都似。
第一手消息請下載on.cc東網
