東網電視
更多新聞短片民主黨（白鴿黨）中委會日前通過革除黃成智黨席，成智尋日開記者會，呢頭話覺得自己嘅言論同行為都無違規，對被革除黨席難以置信，但嗰頭就話已經決定會同志同道合嘅朋友成立新組織平台，仲明言會參與唔同嘅選舉，甚至唔排除參加嚟緊嘅立法會新界東補選添！如果成智唔係被革扯，莫講話新界東補選，今、明兩年區議會同立法會選舉都唔擔保佢有份參選，依家白鴿黨畀個機會佢另起爐灶，話唔定成智先至係求仁得仁。
設計圖片及對白
批「泛民協調失意義」
尋日成智帶埋太太同囝囝黃文軒出席記者會，仲有一直撐佢嘅前黨友狄志遠（Dick）都嚟撐場。成智話，自己曾經幫過唔少乳鴿上位，讓路畀其他黨友參與選舉，甚至放棄埋連任嘅機會，但最後得到咁嘅結果，覺得好難過，又質疑班乳鴿唔念佢嘅貢獻，係感情用事。而阿Dick仲鬧爆白鴿黨無民主，中委會嘅決定係集體政治謀殺，不仁不義。
不過，成智話口未完，就宣布佢會成立新平台，除咗做政策研究，亦會參與唔同選舉，雖然長遠目標係明年立法會選舉，但若趕得切都會參與十一月嘅區議會選舉。問到係咪參加立法會新界東補選，佢就話未決定，自己選或推舉有共同理念嘅人參選都得。至於會否同泛民協調，佢就話依家協調意義不大。
至於新平台幾時成立，成智就話依家同十幾個朋友傾緊，當中有前任或現任區議員，亦有白鴿黨成員。阿Dick就話對黨有感情，但同成智好多嘢都好啱feel，總之一切言之尚早。
除咗阿Dick，黃太同文軒查實都係白鴿黨黨員，被問到會否退黨，文軒就話暫時唔係時候，雖然爸爸被踢走，但都尊重中委會決定。至於會唔會從政，仲喺加州讀書嘅文軒就話見到爸爸搞成咁，香港又立立亂，想留喺加州發展喎。
第一手消息請下載on.cc東網
