設計圖片及對白
鉛水風波愈閙愈大，牽連愈來愈廣，但多名政策局官員就懶理「鉛水」風波，安心大踏步放暑假去。根據憲報資料，發展局局長「波波」陳茂波、環境局局長「星星」黃錦星、商務及經濟發展局局長Greg蘇錦樑同政府新聞處處長聶德權下周起就會齊齊休假，其中阿Greg同聶德權更加放假超過半個月，認真梳乎。
運輸及房屋局局長張炳良、波波等官員尋日一齊就「鉛水」事件見傳媒，仲話要成立獨立調查委員會調查事件。喺政府急急諗辦法拆彈之際，波波喺下周二起休假一星期，期間就要由副局長馬紹祥頂上。無獨有偶，阿Greg亦都喺下周二起放假一周，唔知仲以為佢同波波孖住去旅行。不過，阿Greg就再識歎啲，因為佢放完一個星期假之後，返一日工又再放十日大假喇，真係難為梁敬國要頂咁耐。
其實張炳良出任局長以來，一向都慣咗八月放假，但今年就未有放假安排，據聞係因為佢想睇吓「鉛水」事件嘅發展再作決定喎。張炳良唔敢放假，可能波波都見鉛水風波勢色唔對，其新聞秘書話佢會再考慮係咪放大假喎。
政府高層變半真空
除咗波波同阿Greg，星星下周三起亦會休假九日，期間由副局長陸恭蕙兼任局長。而聶德權亦喺下周三起放到下月十一日，足足放二十一日，期間就由副處長梁文滔兼任處長職務。除咗休假四位局長同官員，政制及內地事務局局長譚志源、政務司司長林鄭月娥同財爺鬍鬚曾都喺下周先後離港公幹。屆時政府最高層可以話係處於半真空狀態，真係辛苦晒署任嘅官員喇！
第一手消息請下載on.cc東網
