政壇：搞搞政：立會提質詢葉國謙食雙蛋

與黨友撞題目逼撤回

數字顯示，發叔零次口頭質詢同四條書面質詢，反而葉國謙情況最嚴重，完全冇提出口頭或書面質詢。勞聯潘兆平只得一條書面質詢；富貴黨方剛口頭同書面質詢各一條，工聯會陳婉嫻得兩條書面質詢；經民聯梁美芬同工黨張國柱都係得三條書面質詢。經民聯盧偉國有三條口頭質詢，公文袋梁家傑同建仔陳鑑林就有一條口頭同兩條書面質詢，湯家驊就有兩條口頭同一條書面質詢。

據知，喺佔領行動期間，好少泛民議員提質詢，所以機會畀晒建制派，之但係建制派提出質詢總數仲少過泛民，究竟搞乜呢？特別係葉國謙，作為建制派「班長」，已經無提口頭或書面質詢，但政改一役搞到甩晒轆，引起建制派內部不滿，甚至嗌換人都係可以理解嘅。佢解釋，有提過質詢有關佔領後嘅處理，但咁啱同黨友撞咗題目，所以撤回喎。嘩，邊個黨友咁大逆不道，連唯一一條質詢都唔讓畀佢問呢？

終於唔使包尾嘅發叔，尋日就罕有現身財委會會議，唔知佢係咪知道統計，心情特別風騷，佢話出席率「唔係包尾算好」，話自己過去三十幾年都喺呢度開會，係佢責任，唔好用「特登」開會呢兩個字嚟醜化佢喎。