李文俊（左起）、李家傑同施榮忻齊為百仁基金出力。
施政報告宣布成立青年發展基金，裝備年輕人創業，由城中二代精英成立嘅百仁基金亦響應政府號召，協助年輕人向上流動，除咗以銀彈資助學生參加考察，更着重鼓勵佢哋訂立清晰人生目標。百仁基金主席兼理文造紙創辦人李文俊（Raymond）話，年輕人應該考慮北上就業，皆因內地經濟增長持續快速，大把工作機遇，分分鐘好景過香港。
成立六年嘅百仁基金早前舉行新一屆董事局就職典禮，Raymond冧莊做多屆主席，做過百仁主席嘅恒基副主席李家傑同施榮忻亦到場助陣。基金主打青年發展，對年輕人嘅需要及心態都知悉一二。曾任機師嘅副主席陳稼晉（Patrick）話最緊要有決心，佢透露當年向全球航空公司同飛行學校寄咗二百幾封求職信，只得三間有回音，最後仲食白果，但Patrick再叩門應徵，兩年後終於獲聘接受航空訓練，所以佢勉勵年輕人唔好輕言放棄。
第一手消息請下載on.cc東網
