陳君宜拎起蛋糕上的糖奶嘴扮飲奶。
富商鄭躬明嘅太太Qinnie陳君宜現已懷孕八個月，下月待產，前晚一眾女朋友包括藝人徐子珊、羅霖、朱慧敏、名人汪詩詩同妹妹汪圓圓、恒生新抱何倍倩、名模歐陽妙芝等，為佢舉行別開生面嘅Baby Shower派對，現場有女友人扮成大肚婆同俏護士，準備定BB公仔，即場上演一幕接生戲，徐子珊玩得興起時作狀伏喺Qinnie嘅大肚子上聽BB心跳，場面好搞笑。
Qinnie一邊切奶嘴形蛋糕，一邊拎起糖做嘅奶嘴扮飲奶，佢話：「我哋玩咗好多遊戲，其中一個傳氣球遊戲，接到氣球嘅人要答一條有關我嘅問題，答錯就要罰飲酒，我全部都話佢哋答錯，罰佢哋飲酒。」佢又話收到好多BB用品嘅禮物，臨近生產心情亦愈嚟愈緊張，現時重咗約三十磅嘅佢話好心急想睇到BB，原本有意開刀生產，但考慮身體恢復問題，所以依家可能會選擇順產。
佢話收到友人送贈一張可愛嘅poster，笑言超愛poster裏面一位媽咪正在推BB車，佢同老公嘅頭分別被key喺媽咪公仔同BB頭上，佢喺網上留言感謝友人為佢開派對，佢講笑話：「好喜歡呢張poster，不過我已經有個癲蠍座嘅老公，唔想有個癲仔。」
第一手消息請下載on.cc東網
