設計圖片
勞工界爭取多年嘅男士侍產假議案喺舊年底終於獲立法會通過，泛民主派嘅議員梁繼昌同工黨嘅李卓人曾提出四項修訂，將侍產假由三日增至七日，搞到一班勞工界議員左右不是人，即係支持修訂就可能得罪勞顧會，唔支持又會被指背棄打工仔利益，結果工聯會就修正案投下棄權票，因而被泛民借勢攻擊。曾經擔任立法會勞工界議員嘅工聯會副會長梁富華接受訪問時，炮轟泛民成日為博表現不惜抬高個價，最終乜都爭取唔到。
梁富華當年喺議會內成日同泛民針鋒相對，仲不時語出驚人，估唔到佢依家仲係咁好火，好似日前接受立法會議員Ann蔣麗芸訪問時，就侍產假為工聯會護航兼鬧爆泛民。阿Ann話戥工聯會唔抵，因為工聯會早喺大約十年前已經提出侍產假，明明爭取到三日，班泛民又話要七日。
「一步到位冇好結果」
梁富華就引用番當年喺議會嘅經歷做例子，話說當年討論增加賠償基金同僱員殮葬費，加幅一倍，但有議員就唔滿意，要求加超過一倍。梁富華覺得立法時訂立最低標準，係希望僱傭雙方都享受到權利，「呢個世界一步到位最後都冇乜好結果，反而係要循序漸進」。
阿Ann又問到可唔可以將勞顧會嘅議題直接交由立法會議員討論，梁富華認為唔係一個可行嘅方法。佢暗示某啲議員為博表現會天馬行空咁討論，咁就代表「我幫你爭取咗」，就算最終爭取唔到啲乜，都係政府同僱主嘅責任；又或者係勞方邊個唔支持，就係出賣工人利益。假如由立法會主導有關事宜，佢覺得會令勞工福利出現問題。
工聯會經常為人詬病嘅地方，就係佢哋喺工潮出現時，好少發起罷工撐工人。梁富華解釋，根據工聯會嘅政策，罷工往往係最後手段，但佢哋都有過標誌性嘅罷工行動，例如喺九四年堵塞香港仔隧道、○二年堵塞長青隧道，雖然兩次都係僅僅維持咗十五分鐘，但已經換取到一定成效喎。今次個訪問，點睇都似係阿Ann搭台畀工聯會解畫，唔知工聯會點樣報答阿Ann嘅人情呢？
第一手消息請下載on.cc東網
