黃定光用木筷子製成「投票神棍」，笑料百出。
話說立法會財務委員會尋日繼續審議興建石鼓洲焚化爐嘅撥款申請，正當一班建制派議員猛呻又要留喺會議室不斷撳掣投票時，進出口界議員「象哥」黃定光就倣效時下好流行嘅「自拍神棍」，用木筷子自製一支「投票神棍」，每當投票時就唔使俯身向前撳掣，避免整傷條腰骨。
陳恒鑌（左起）、何俊賢同吳亮星湊熱鬧睇吓黃定光用「投票神棍」。
象哥話中午食飯時見到枱上有一對木筷子，諗起下晝又要坐定定投票，於是心生一計，用膠紙將兩支筷子黐埋駁長製成「投票神棍」，只要用支棍一篤枱頭個掣就可以投到票。唔少建制派議員都大讚象哥支「投票神棍」好實用，但就要小心咪手震，萬一撳錯隔籬個掣就大鑊喇！
金融界吳亮星就笑笑口話，泛民主派有「政棍」，建制派就有「神棍」，莫非佢想泛民同建制兩邊都寸勻？不過，最搞笑係議員李慧琼借咗象哥支棍嚟用，但支棍黐得唔實淨，搞到篤極都篤唔到個投票掣，最後笑笑口還番支棍畀象哥。撳掣投票都咁艱難，睇嚟秘書處要引入遙控投票系統先得嘞！
第一手消息請下載on.cc東網
