設計圖片及對白
身為泌尿科聖手嘅香港大學校務委員會主席「金刀梁」梁智鴻，醫術高明就眾所周知，但叻人都有缺點。金刀梁自嘲乜嘢都唔識，有樣嘢亦令太太Lilian馮令儀覺得好唔抵，就係金刀梁行醫幾十年來，從來唔識買定舖位做診所，連車位都租足幾十年，變相白白幫人供舖供車位。
早前遇到金刀梁，問佢做咗幾十年中環人，對區內人事變化最大感覺係乜？點知佢諗都唔諗就話中環呢幾十年最大變化就梗係租金啦！佢話自己由一九七八年開始由政府醫院做到私人掛牌執業，選擇咗金融核心中環區創業，最終揀咗名醫雲集嘅中建大廈開醫務所。
佢又話當年租用七百呎地方，眨眼間至今已租咗三十七年。當年市場每呎租金只係七元八角，但依家已累積升幅高達十五倍有多。
有議員車位照納空租
不過，最令佢諗極都唔通嘅就係咁多年明明租用同一單位，點解依家收到租單嘅顯示呎數係由七百呎變成一千一百呎，佢笑稱唔通層樓都會長大嘅？佢又話幾十年前中環返工車位亦好難求，當年幾經辛苦用半年時間先搵到個車位在對面商廈，租金仲幾貴添，就算當年做立法局（會）議員有專用車位供應，都情願納空租保留車位以備不時之需，仲係一租租到依家。
佢多年來雖唔着緊交貴租，但佢太太Lilian就不時「哦」佢淨係識得做醫生，唔識得長遠投資，如果當年肯買入商廈單位及車位就唔使白白幫人哋供舖供車位嘞，依家肯定升值唔少咁話。
金刀梁坦言，自己本來只識得做醫生工作同睇症，後來好彩有人畀機會佢擔任公職後，先有機會接觸到有關醫學以外嘅知識，從而慢慢學習，但多年來碰釘子就在所難免喇。佢仲勉勵依家修讀專業科目嘅大學生，一定要擴闊視野，多接觸不同知識及事物，咁就更加相得益彰嘞！
第一手消息請下載on.cc東網
