SUN微博：打橫嚟講：東頭邨老舖，撐呀
唔知幾時，「和平理性」，變咗緊箍咒，好似行出咗條街示威，都要畀人告。嗰啲可憐兮兮嘅小資中產，就仲以為自己咁樣，就係文明嘅表現喇。
之但係，東頭邨街坊一於話之你，為保合理賠償，攬晒石油氣罐上身，誓要同收樓嘅房署玉石俱焚，呢啲就真係有骨氣、有霸氣喇！
事緣房署打算收番東頭邨第廿二座二十五個舖位，整棟拆卸重建公屋。起公屋當然值得支持，但係呢，房署職員揚言斷水斷電、成個黑社會咁之外，最弊都係賠償，竟然仲按○八年標準！譬如搞冰室嘅蔡太，五個舖夾埋賠八十幾萬，喺依家個市道，都唔知搬得去邊？
最搞笑係，藥房東主張婆婆七十年代用二十幾萬買舖，家陣賠十幾萬，問你死未？依家話晒人哋畢生心血事業，係唔係仲應該再盡量多啲，至少都要畀個心水價人啩？你話喇，如果唔係依家搬埋石油氣出嚟，又點會爭取到房署畀佢哋過埋中秋先呢？
那邊廂，科大外判工人臨到中秋，又重複唔知第幾千個n次咁收唔到人工，於是走出馬路靜坐抗議。所謂邊度有壓迫，就邊度有反抗，所以話啦，「和平理性」，都要睇吓情況o架。
次文化考古學家，對城中潮語有深入研究，博徵博引，廢官廢人行埋一邊。
就係敢爆：政壇亞洲先生競選
讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！
email：sunweibo@opg.com.hk
