慳妮養女捱到殘

產後火速復工搵奶粉錢的郭羨妮，自誕女後即化身「慳媽」，前日以殘爆師奶Look與母親及樣貌似足父親的女兒，一家三口「慳」享天倫。除了選擇平民化餐廳外，連Shopping也睇多過買，與同樣以「慳」出名的港姐媽咪楊思琦一樣，總之慳得就慳！

自五月誕下寶貝女Kylie後，郭羨妮（Sonija）閉關湊女兼收身，日前更復工為新劇《初五啟市錄》試造型，作為復出頭炮。除了過戲癮外，當然最緊要忙賺奶粉錢。最近傳出要撲水養家的Sonija開工後少了時間湊女，加上老公朱少杰身在內地工作，故前日特別湊女外出享受家庭樂，更捨棄行名店改行大眾化商場！

前日下午五時許，Sonija以素顏、踢拖及戴鴨舌帽遮殘樣的師奶造型，駕車接載媽咪及四個多月大的女兒Kylie，到屋苑附近商場醫肚，可能因拍劇太辛苦捱到殘！到達商場後，兩母女合力取出BB車安頓好熟睡的Kylie，然後到一間平民化日本餐廳。現場所見，Sonija駐足研究餐牌的價錢後才入內用膳，可謂應使則使。醫肚後，Sonija繼續與母親在連鎖店內閒逛，但全程齋睇冇買。沿途所見，Sonija被門外貼上「大減價清貨」的時裝店所吸引，睇到眼甘甘，極有興趣，但最後仍忍手冇買。未知是否復工勞累，行完連鎖店後，兩母女往一間經濟實惠的按摩店，平歎腳底按摩，約一小時左右離開。

雞手鴨腳險翻BB車

一行三人隨後往停車場取車，全程未見抱起女兒的Sonija推BB車上扶手電梯時，起初有點雞手鴨腳，更險令BB車翻車，幸好郭母及時出手托實，有驚無險。至於Kylie的樣子愈來愈似父親朱少杰，眼細細的她「圓碌碌」又肥嘟嘟，兼有一雙「節瓜腿」，相當趣致！問到中秋節會如何度過？Sonija說：「要開工！（同老公一齊慶祝？）睇吓點，真係未知。」