政壇：黃成智唔服輸追殺慢必

白鴿黨黃成智喺剛過去嘅立法會選舉中落敗，相反佢嘅「死敵」人民力量「慢必」陳志全就成功喺新界東當選。雖然選舉告一段落，但餘波未了，黃成智尋日陪同兩位愛護家庭家長協會嘅成員去警署報案，話慢必作為行政總裁嘅香港人網涉嫌發布色情資訊，可能違法，要求警方徹查。

黃成智強調自己唔係針對慢必，事件亦同選舉無關。

慢必就回應話，覺得呢類指控好奇怪，皆因網上唔少討論區都有所謂嘅「成人區」，加上內容均由網民提供，唔明對方點解針對佢。佢透露，十月前會辭去香港人網行政總裁一職，專心立法會工作。問佢覺唔覺得黃成智係唔忿輸時，佢笑笑口答話：「你咁問到，我會話係囉！」