SUN微博：打橫嚟講：文化品味？生意嚟啫！
希望愈大，失望愈大。
台灣誠品書店來港搵食，有好多香港傻瓜新屎坑怕執輸，一窩蜂擁去，點知發現書價比附近其他二樓書店還貴（即食水深啦！），其次，以為這裏地大格調高，殊不知到頭來又係路窄雜貨亂，似足香港書展墟市，用盡每寸空間賣嘢，沒丁點文化品味，好市儈耶！
誠品一直建立的形象，以優皮閒適，高雅寫意自居，但這全是他們學習日本行銷策略的必殺技而已！例如香港店開幕前．不接受記者現場採訪，只派發自己影的「靚仔相」，睇落好闊落，又話有四萬幾呎，總之搞到好神秘，叫人好期待，開幕時咪引來一大班人朝聖囉！
今日的書店，不再是光靠書本作招徠，猶如銅鑼灣這新商場，特價優惠誠品擺檔，做成協同效應，令全港矚目，呢啲咪係商業策略囉！否則，有鬼人理佢乜乜商場開張咩！
早年前，誠品的大老闆跑去大陸叩門，想進軍強國市場，人家畀佢喺蘇州開檔，這大老闆接受記者訪問時回答，話入貨前願意接受內地的審查，嗱！呢啲咪叫做生意囉！這便叫做成功囉！生意佬做書本買賣，雖然係做緊文化推動的工作，但不一定係文化人，更遑論係知識分子呢？
香港傳統大型書店集團何解做極不長進，無文化味，要台灣的才有品味？應好好反省！我一早看穿誠品，所以沒有期望，便沒有失望！你呢？
次文化考古學家，對城中潮語有深入研究，博徵博引，廢官廢人行埋一邊。
email：sunweibo@opg.com.hk
