政壇：政商定格：林D9機場廁所姿整梳頭
曾講過話「知所進退」嘅前政務司司長「林D9」林瑞麟，卸任後「退」到英國牛津大學進修神學一年，但一直冇講幾時起行。尋日有讀者爆料畀我哋知，話朝早八點半左右，身穿西裝冇打呔嘅林D9，現身機場離境禁區嘅洗手間入面，身邊有個小型行李箱同公事包。
只見林D9當時正聚精會神咁梳靚個頭，一手拎住把扁梳，一手撳住頭髮，學足《阿飛正傳》入面嘅梁朝偉咁，由左至右咁梳到個頭立立令，真係一「絲」不苟。
當佢一見到有人走入嚟，即時處於戒備狀態，拿拿聲收埋把梳，急急腳拖篋走人。其實貪靚梳頭都係人之常情，林D9唔使咁緊張。
