政壇：KK旺角掛大招牌寸貪曾
立法會前日三讀通過出缺機制安排，有意轉戰超級區議會選舉嘅民協馮檢基（KK）喺二讀同三讀期間近乎隱形，不過，喺街頭就好易見到KK嘞，事關九月立法會選舉將至，貪曾事件搞到全城鬧爆，KK都出絕招，喺人來人往嘅旺角懸掛寸爆貪曾嘅巨型廣告招牌，驟眼睇落仲好「凸」出添！
有網民喺社交網站報料，見到KK喺旺角亞皆老街同染布房街交界一幢樓宇外牆懸掛咗個大型廣告招牌，以「政商勾結，無法無天」呢八個字寸爆貪曾，最吸引眼球嘅係個招牌大得好誇張，無論係搭車定行經，都好難見唔到個大招牌。
我哋就以呢個「凸」出嘅招牌設計問過KK，佢話係廣告公司全權負責，由尋日開始懸掛至本月十八號，之前亦喺旺角銀行中心附近懸掛類似嘅招牌。呢個招牌估計起碼要數萬元，財力唔算大嘅民協今次真係揼本噃。
