政壇：霍震宇姊弟接力陪媽咪
已故全國政協副主席霍英東家族爆出爭產官司，主角之一嘅霍家長房三公子霍震宇雖然忙於處理訴訟問題，尋日都趁周末約阿媽去中環置地廣場飲茶，佢醉心攝影嘅家姐霍麗萍（Pat）亦前後腳現身。
尋日下晝一點鐘，着西裝唔打呔嘅霍震宇一支公走入Cafe Landmark，揀咗個卡位坐，冇耐就見佢拎部iPad出嚟玩。大半個鐘後，霍震宇終揮手落柯打叫咗碟頭飯，極速十分鐘掃光後，霍老太就同一位友人到場，霍震宇幫佢哋點好嘢食後，唔知係咪有事，佢好快先行離開。佢呢頭啱啱走，嗰頭就見身穿啡色套裝、戴住墨鏡嘅Pat出現，接力陪媽媽及友人撐枱腳。
霍震宇（左）幫霍老太（拿餐牌者）及友人點完嘢食後，就迅即離開。
霍震宇
霍麗萍（左）緊接弟弟出現，接力陪霍老太（右二）撐枱腳。