政壇：馬清鏗好息瞓身抽iBond
政府推出嘅第二輪通脹掛鈎債券（iBond）將出爐，雖然息率得番三厘幾，但唔少股民仍認為有肉食，好似東華三院前主席馬清鏗（Patrick）都話會全力出擊。身為「潮州冷」嘅Patrick日前出席潮州商會宴會時呻笨話，首批iBond派息有六厘幾，加埋債券價格升幅，回報相當可觀，但佢走寶冇抽到，所以今次一於補飛，瞓身認購喎。
不過，身為東華前總理嘅名媛林李婉冰就嫌三厘幾息太少，回報唔吸引，寧願買股票或磚頭好過嘞。講番當日宴會，其實係慶賀榮任六大慈善團體要職嘅「潮人」，包括東華總理陳曉鈴，即係富商陳有慶孫女；保良局則有副主席鄭錦鐘、總理蔡李惠莉、陳正欣等；博愛都唔弱，有主席潘德明同副主席彭少衍；仁濟醫院就有主席鄭承隆。
馬清鏗（左）準備彈藥抽iBond，林李婉冰（右）就話唔會抽喎。