政壇：搞搞政：Mandy踏兩船鬧錯選舉處

各方爭戰九月立法會，前立法會會計界議員譚香文（Mandy）都有新動作，不過，未參選佢就鬧單烏龍事件。事緣佢日前漏夜發出新聞稿，怒轟選舉事務處剝奪佢喺會計界嘅投票權同參選權，指控咁嚴重，梗係惹人關注。點知查證下發現，原來係佢做咗區議員，但又想保留會計界選民資格，一人冇可能踏兩船o架，所以Mandy因而鬧選舉事務處並唔恰當，因為人哋都係按法例辦事。

Mandy喺新聞稿指出，選舉事務處喺冇諮詢佢意願下，將原本屬於立法會會計界功能界別選民嘅佢，登記咗做區議會（第一）界別嘅選民，不但令佢喺九月選舉冇得喺會計界選舉投票，仲令佢喪失循會計界重返立法會嘅參選資格，要求選舉事務處交代同解釋。

我哋就Mandy嘅投訴問過選舉事務處，該處回應話唔方便評論個別個案，但就列出有關法例，澄清只要同會計界有密切聯繫，就可以喺該界別參選，唔一定要係會計界登記選民喎。言下之意，即係本身係會計師嘅Mandy，仍然合資格參選會計界。此外，該處將本身係黃大仙區議員嘅Mandy自動登記做區議會（第一）界別選民，亦係法例規定嘅正常做法，希望佢下次搞清搞楚先至出稿鬧人喇！