政壇：八字運勢早批中 貪曾臨別衰鑊甘

曾蔭權爵士被揭發外訪豪歎豪遊、窮奢極「恥」後，民間要求佢回水、落台嘅聲音此起彼落，貪到最後一分鐘嘅貪曾備受煎熬、四面楚歌之際，原來佢嘅八字推算流年運勢已有披露，年初我哋搵嘅術數師楊師傅曾推算貪曾會喺執包袱前搞鑊大大鑊嘅，未來數月又點呢？楊師傅話佢仍然會講多錯多，更會被下屬累死。

農曆九月貪曾夫婦反目

年初嘅時候，我哋曾請來香港術數家協會術數師楊子東預測一眾高官同立法會議員嘅龍年運勢，從貪曾八字其中嘅年月日三柱批算，批中禍港七年嘅貪曾，會喺農曆三月「精神恍惚、易出錯」，臨執包袱前都會搞鑊大大鑊嘅，佗衰香港，最後全部貼中晒。貪曾豪訪南美，正正喺農曆三月，期間佢入住每晚五萬幾蚊嘅總統套房，相信當時佢萬萬估唔到自己貪出禍來。

楊師傅多年來多次批中高官同議員運勢，當中尤以貪曾特別準，只要睇番本報嘅報道就一清二楚。展望未來，楊師傅再批算喺六月五號正式踏入農曆五月後，貪曾命格忌火土、「食傷旺」，意味佢會繼續講多錯多，而且仲會被下屬連累。踏入農曆六月，楊師傅指雖然貪曾到時已經卸任，但是非小人依然不絕。

楊師傅話農曆九月「天黑地冲」，貪曾運勢未許樂觀，更可能出現「因財失義」，甚至夫婦間可能有爭拗同反目，只係外人未必會知。總括一句，有咁耐風流，有咁耐折墮，貪曾好快知喇！

其他人又點？前政務司司長許仕仁（肥龍）近期亦官非纏身，楊師傅年初批過肥龍嘅八字話佢要小心健康，又話肥龍會喺龍年行忙碌運，曝光率大增，但唔係為咗工作喎。咁為乜而曝光呢？見到佢喺廉政公署出出入入就知啦！