政壇：鄧振豪開分店猛人嘗麵
豚王拉麵第二間分店尋日開幕，落戶銅鑼灣登龍街，餐廳老闆鄧振豪同爸爸佳能高級副總裁Mingo鄧慶治交遊廣闊，先招呼城中逾百名老友免費嘗鮮，兩父子親自迎賓、送客，甚至落柯打，忙到不可開交。
Mingo話主廚特登熬煮由豬骨及(魚立)魚為材料嘅湯底宴客，平時有錢都食唔到。濃郁鮮甜嘅湯底加上煙韌嘅拉麵，食到眾人讚不絕口，如果滿分十分嘅話，「快勞夾大王」杜振源話要畀十一分，仲勁讚餐廳係城中拉麵王添！
老闆振豪就話，新舖唔止座位多咗，菜單選擇亦多咗兩款，包括由咖喱炮製嘅「元氣王」湯底及以蝦為材料嘅「海老王」湯底，而且新舖供應十足，唔似中環店每日最多賣三百碗，所以食客可以大飽口福喇！
