政壇：「曾」疏有別係人都知

煲呔曾尋日宴請全體立法會議員去禮賓府食晏，怕且都係佢呢個夕陽政府最後一次，但佢就貫徹親疏有別作風。

尋日坐喺主家席嘅議員唔多，大致有經濟動力林健鋒、梁君彥、白鴿黨涂謹申、李永達同職工盟李卓人等，但坐得最近煲呔曾嘅係林健鋒同立法會主席，泛民議員起碼隔咗兩個位。可能因為咁，據講成餐飯嘅氣氛都好好，煲呔曾全程冇黑面，事關冇人當住佢面提佢啲衰嘢嘛。

主席歎雞髀 議員捱雞腳

到咗上湯嘅時候，眼利嘅林健鋒望一望自己碗中嘅雞腳，再望一望隔幾個位嘅立法會主席個碗，然後掃勻全枱其他議員個碗，駭然發現淨係主席個碗中有原隻雞髀，其他議員同佢都只係得雞腳。於是乎素來談笑風生嘅佢轉過身，笑笑口幽餐廳職員一默，問點解會大細超呢？在座其他議員都係食雞腳，淨係主席有雞髀食？餐廳職員見佢問得咁過癮，佢亦以詼諧方式答話，「因為我都係姓曾囉」。

林健鋒同我哋都深信餐廳職員純粹講笑，但夕陽政府之中，上至煲呔曾、財爺鬍鬚曾，下至警務處處長曾偉雄，仲有立法會主席都係姓曾，以煲呔曾親疏有別嘅思維，如果係佢分湯，佢做得出呢回事並唔出奇。當然我哋不厭其煩地重申，我哋唔認為餐廳職員有意咁做，但亦不排除佢知道煲呔曾嘅心意，所以特別優待主席，萬一真係咁，大家冤有頭債有主，只好怪上樑不正下樑歪嘞！