政壇：肥亨兩千金籲捐六千蚊
政府派發嘅六千蚊陸續到手，市民打算點用？前商務及經濟發展局局長「肥亨」馬時亨兩位千金馬露明（Christine）同馬露玲（Andrea）攜手發起個名為「GeneroCity」嘅慈善活動，呼籲各界捐出六千蚊，幫助有需要嘅小朋友同家庭。
「Generosity」意指慷慨、無私嘅行為，而馬家兩個千金搞嘅「GeneroCity」，就有慷慨都市之意。佢哋首個計劃係為深水埗逾百名六至十二歲嘅兒童提供功課研習、興趣班、外遊活動等，望培育兒童「六大品格支柱」，即尊重、盡責、公平、可靠、關愛同公民責任。
馬露明（右）同妹妹馬露玲合力發動GeneroCity慈善項目，幫助有需要嘅小朋友。