政壇：劉展灝娶新抱緊張過結婚
年尾嫁娶喜事多，做鐘錶生意嘅工業總會副主席劉展灝（Stanley）前日娶新抱，喺尖沙咀洲際酒店大宴賓客，到賀嘅政界高官同工商界高層多到數唔晒，劉家要連擺兩日酒宴至招呼得晒。新郎劉燊濤抱得美人歸，自然開心到震，不過，做老爺嘅Stanley都不遑多讓，仲講笑話緊張過當年自己結婚喎！
到賀嘉賓中，仲有一班本港企業家第二代，如工總主席孫啟烈囝囝孫榮聰同孫榮良、德國寶太子女陳嘉賢、廠商會副會長顏吳餘英囡囡顏明秀等，齊齊見證一對新人嘅濃情蜜意。其實，前日娶新抱嘅鐘錶界人仲有前鐘錶業總會主席梁青華，唔少城中名人趕場趕到索晒氣。
新郎哥劉燊濤（右三）娶得美人歸，幸福滿瀉。左起為劉展灝細仔Ronald、劉展灝夫婦，右起為新娘父母。
一對新人當年喺冰天雪地拍下溫馨合照。