政壇：李漢奸民主阿婆被唾棄

做人知所進退好緊要，好似曾自稱「日日做漢奸」嘅白鴿黨創黨主席李柱銘同「民主阿婆」陳方安生咁，退下火線後依舊戀棧權位，不時做塘邊鶴對香港政局說三道四，終究都係會被市民遺忘唾棄。有民調顯示，佢兩人已經跌出市民最熟悉嘅十大政治人物排行榜，證明呢兩粒政界舊電池連回收都冇價值，要直接送去堆填區。

港大民意研究計劃喺本月上旬訪問咗過千名市民，結果顯示有四人跌出十大，除咗李漢奸、民主阿婆同立法會主席曾鈺成，最令人意外係身為特區第三把交椅嘅財政司司長鬍鬚曾都跌出排名榜，可見呢位財爺喺市民心目中已變得可有可無。取代四人嘅包括已表明會參選特首嘅梁振英（CY）同白鴿黨主席鐵頭仁，以及公文袋黨魁袋巾傑同職工盟立法會議員李卓人。

CY同鐵頭仁上榜，唔使問都同特首選舉有關。至於袋巾傑同阿人上榜，相信係因為公文袋同阿人喺今屆區議會選舉中輸到趴街，曝光率大增。當然，排得上十大熟悉政客榜亦未必係好事，但起碼仲算喺政界中有影響力、唔似李漢奸同民主阿婆咁黯然跌出十大，可以正式宣布收山。