政壇：彤叔搵阿仔做代言人
近期股市波動，樓市又回軟，新世界發展尋日召開股東會，主席「彤叔」鄭裕彤亮相時，大堆記者蜂擁而上，想聽吓佢對樓市、股市嘅睇法，點知彤叔話：「你咪問我呢啲，我冇理！」跟住又叫大家有乜問題搵鄭家純啦，好似將集團重任交晒畀阿仔咁。
不過，大家都唔死心，想了解周大福珠寶上市一事，彤叔繼續唔答，揼低一句「冇理」，之後就嗱嗱臨走人。畀老父下令應付各方問題嘅阿仔、新世界董事總經理鄭家純就話，佢哋對周大福上市有信心，稍後會開記者會交代喎。
講開周大福，尋日都有單花絮，事關廣州市工商局做咗今年第三季嘅貴金屬玉石質量監測，當中有近三成唔合格，而「周大福」唔係榜上有名啩？捽吓眼睇清楚，原來係「周六福」，爭啲睇錯添！
彤叔尋日出席股東會，問題一概交由阿仔鄭家純回答。