政壇：煲呔曾怨年輕人大想頭

任期所餘無幾嘅煲呔曾民望插水，民調顯示後生仔反對佢做特首嘅比率係各年齡層最高嘅，而煲呔曾亦對青年人戒心好重，尋日佢接受報章專訪時，又歸咎年輕人怨氣大係因為「理想大」，怨社會唔公義，變相狠批香港年輕人「大想頭」。佢呢番言論同唐唐鬧80後「車毀人亡」有得揮，結果當然惹嚟網民狂插啦。

喺一個聚集大量年輕人嘅討論區上，網友們都踴躍對煲呔曾嘅言論發表意見，簡單啲講就係狂炳、狂鬧。網民「為公義發聲」，一針見血咁話：「自己無能，走去賴年輕人！」「一米九四」就揶揄煲呔曾：「轉過頭又話年輕人無志氣。」「Intel_King」就不齒咁話：「理想大年輕人專訪：怨氣源自曾蔭權。」

由於煲呔曾嘅言論實在太討厭，呢篇專訪轉載冇幾耐，即刻收到大量聲討嘅留言，喺好短時間內已經有過百回應。「LonelyLun」笑稱：「你做好啲，我哋邊有得怨？」亦有網民直斥：「淨係識養錦鯉，你估香港人係你嗰幾條昭和三色咩！」臨走都走去挑釁年輕人，到底煲呔曾個腦係點運作o架？