政壇：搞搞政：肥仔張落區 升呢張醫生
新一屆飲食界選委因為富貴黨「肥仔張」張宇人同廠商會黃家和各自出名單，罕有咁出現爭崩頭情況，肥仔張尋日率領一班選委去北角春秧街街市拉票，卻遇到尷尬情況，事關啲街坊唔係認錯佢，就係叫錯佢做「張醫生」，反而佢隔籬嘅「蘭桂坊之父」盛智文就大把人識。肥仔張最後都要執生話，選民唔認得佢唔緊要，因為佢冇參選，最緊要係班選委有人認得喎。
呢句說話有冇酸酸地，大家自己諗啦，不過，好多街坊都認得身兼海洋公園主席嘅扮嘢文，女士更紛紛變成粉絲，有人要合照、有人攞簽名，有啲捧場者問佢：「乜你唔係搞海洋公園咩？」似乎對扮嘢文以蘭桂坊飲食業界人士身份出選嘅背景一無所知。
肥仔張尋日都趁機提醒班參選人，嗌佢哋呢兩個月唔可以周圍請人食飯，以免有賄選之嫌，甚至連自己夥計都唔可以請，直到選完為止喎。
設計圖片及對白