政壇：釐清最低工資計法 翟紹唐唔敢接波

法定最低工資推行超過半年，由資深大狀翟紹唐做主席嘅最低工資委員會近日相繼同商會、工會見面，聽吓佢哋對最低工資檢討嘅意見，雙方唔使問都係各說各立場，南轅北轍到大纜都扯唔埋。有與會代表尋日要求委員會研究將飯鐘錢、休息日計薪等納入最低工資中，或清晰列明兩者是否計薪，呢個問題年前曾經引起軒然大波，但政府縮骨唔理，翟紹唐尋日都唔肯接波，話政策問題係政府嘅事喎。

呻最低工資增營運困難

年前員工被扣飯鐘錢鬧出風波後，唔少食肆同服務行業都出現勞資關係緊張嘅現象，不過政府卻懶理，仲話飯鐘錢係僱傭雙方協議嘅，咁樣同暗示扣飯鐘錢冇違法有乜分別﹖結果勞資糾紛未解決，業界人士咪趁最低工資委員會諮詢檢討意見時，要求低資會出面囉。

不過，工會代表嘅建議雖然想清晰最低工資嘅計法，但咁樣做嘅話，就好似將原本困擾政府嘅波，推咗畀翟紹唐領導嘅低資會咁。身兼法律界精英嘅翟紹唐尋日好有技巧咁避開咗陷阱，佢話飯鐘錢同休息日計薪嘅問題，係政府嘅決策問題，唔係佢哋委員會管轄範圍，即係低資會唔會跟進。結果佢一閃身，又將個波畀番政府。

尋日嘅會面仲講到最低工資落實以嚟嘅問題，翟紹唐總結話，唔少僱主認同最低工資對僱員的士氣有正面影響，但另一方面亦增加咗營運困難，令人力資源管理工序增加。點都好，統計處喺明年首季至提交最新數據，佢哋要喺明年十一月前制訂第二個建議嘅最低工資水平實在有困難。