政壇：李漢奸有病棄鴿撐公文袋

每逢選舉，白鴿黨創黨主席李柱銘都四出為黨友拉票，但係今次唔同，因為早前黨內傳出李漢奸有腎病，黨友都唔敢開口叫佢去支持。李漢奸尋日的確冇去撐黨友，但竟然去咗為公文袋喺山頂出選嘅陳淑莊助選，喺區內逗留咗一個鐘。

尋日李漢奸晨早揸車去投票，跟住就去教堂望彌撒，下晝四點左右，先至到紅棉道嘅票站為陳淑莊站台，佢話因為自己住呢區，對方選情告急喎。記者問佢會唔會去屯門樂翠區撐同樣選情告急嘅白鴿黨主席何俊仁，佢就好絕情咁話，今年講咗邊個都唔幫。唔知白鴿黨員見到呢個創黨主席手指拗出唔拗入，有乜感想呢？

佢向記者澄清，話唔係腎病，係腎石，猛話「好小嘢嚟啫」！佢照過X光，不過冇問醫生粒石有幾大，而最近較忙，等忙完先做手術喎。記者問佢腎石會唔會影響生活，佢就話自己行得走得，點會有影響？冇影響但又只能幫陳淑莊一個，真係得佢自己至知點解嘞！