政壇：投票騷鐵三角鬥搶鏡

區議會選舉尋日進行投票，疑似特首候選人「鐵三角」唐唐、CY梁振英同全國人大常委范徐麗泰照樣出動，各有各忙。唐唐早上拖實老婆去山頂德國瑞士國際學校投票，然後同囝囝等人到南區鴨脷洲街市買海鮮，攞到樓上熟食中心代做午餐。唐唐及後到深灣遊艇俱樂部做健身，直到下午離開，再驅車到跑馬地山崗道馬會會所。

話說唐唐早上投票後約二十分鐘左右，CY兩公婆又到同一票站投票，然後去太子道飲茶後，再去行花墟，原來佢想去買朱頂蘭。不過，CY話喺飲茶同行花墟嗰陣，有好多市民同佢傾偈合照，搞到佢買唔切花喎。佢於是出席埋下午舉行嘅大埔禁毒活動，同埋去考察完牛頭角下邨後，先返去花墟買朱頂蘭，行程非常緊湊。

范太朝早就到維園出席明愛賣物會開幕禮，剪綵後同香港教區主教湯漢一齊參觀賣物攤位。有攤位負責人見到范太開心到即刻衝上前，話要送贈飛機模型畀范太，但范太就擰頭示意話唔收得，但范太最後都捐咗二十蚊，買咗四把刀返屋企。范太話以前收收埋埋好多朋友送贈嘅禮物，有時都會捐予善慈團體做義賣。