Sun世代：太子鐘情

「創業難，守業更難」很多人都聽過，對劉燊濤（Gary）來說，肯定別有一番滋味。他與弟弟及一手創立鐘錶公司的父母，正合力開拓生意版圖，「一星期七日都係工作」，惟他沒有視為苦差：「細個已經接觸鐘錶，對鐘錶有濃厚感情。小學三年級時我已明白，自己食鐘錶飯大，將來都要投身呢個行業。」

劉燊濤四年前由英國返港，因作風低調，加上大部分時間投身工作，故較少在公眾場合曝光。返港之初，Gary原打算到其他公司工作，藉機鍛煉自己，但不忍見到父母太辛苦，遂打消念頭，全家人一起為事業打拚。「細個見佢哋（指父母）朝早出門口時，都好精神同識笑，但收工返嚟，完全唔同晒樣！所以想盡量減輕佢哋嘅工作量。」

在香港讀完中學二年級後，Gary轉赴英倫升學。在學期間，每年有三個長假期，為及早熟悉行業運作，每逢放假，他都將全部時間投放在家族生意上。「復活節假期同瑞士巴塞爾鐘錶展重疊，會由英國直接飛去瑞士幫手，做咗搬搬抬抬嘅『苦力』工作；暑假同聖誕假就返香港嘅廠房幫手，今日落機，第二日即刻返工。」回憶往事，Gary始終面帶笑容，可見他對這段「童工歲月」十分懷念，沒有視作苦差。

對於鐘錶，Gary有一種難以解釋的偏愛。他笑說：「唔知點解鍾意，已經入晒血㗎啦！」這份偏愛，或與父親自小潛移默化有關。「細細個開始，Daddy經常同我哋講解不同鐘錶嘅歷史，放好多心血喺我同細佬身上。」這位在Gary口中尊稱為「劉生」的父親，正是香港鐘表工業協會主席劉展灝。在他眼中，父親更是集「三老」於一身，即「老竇、老闆、老師」。

深明責任大未敢鬆懈

Gary現任飛騰錶業的品牌經理，經常要到世界各地出差，與鐘錶設計師開會、參加大型鐘錶展覽會、與各地代理商會面。公司旗下擁有四隻品牌，其中三隻是瑞士品牌，一隻則為香港品牌，市場遍布全球，包括日本、越南、內地、土耳其及中東和美洲等地。頻繁的出差經驗，為他留下不少難忘經歷：「記得三年前第一次去中東，喺沙特阿拉伯一間酒店食早餐，隔籬坐咗成隊軍人，個個揹住AK47機關槍，你都咪話唔驚！」

身為家族公司的第二代，Gary深明自己責任重大，從未敢鬆懈，皆因「呢行投資好大，但未必有回報！」他和父母、弟弟一家四口都在錶廠工作，工作時間對着鐘錶，茶餘飯後的話題也是鐘錶，「唔講反而唔慣」。「同女朋友行街拍拖，有時經過錶舖，都會『自動波』走過去睇。」不過，相約與朋友一起打高爾夫球的輕鬆時刻則是例外：「同圍內朋友打波，情緒會放鬆好多，嗰段時間會暫時放低鐘錶，唔去諗同鐘錶有關嘅嘢。一個禮拜最少要有幾個鐘頭時間，畀個腦休息一下都要啦！」