Ana R.擱置飛美　卿卿憂爆復仇

美國總統奧巴馬昨日宣布阿蓋德恐怖組織領袖拉登已死，消息震驚全球！於美國紐約定居的息影女星葉玉卿，擔心恐怖分子進行復仇襲擊；名模Ana R.直言或會擱置往美國探親，擔心會與恐怖分子同機。

息影後在美國紐約定居的女星葉玉卿，越洋接受本報電話訪問時表示，正在送子女上學途中，雖已得知拉登死訊，但不能肯定消息是否屬實：「處決呢個咁恐怖嘅狂人當然係好事，雖然我唔識政治，但喺美國人心目中，奧巴馬上任後經濟好差，國人對佢好失望，唔單止窮人失望，連有錢人都憎佢，所以我好擔心呢個消息係佢為咗連任嘅手段策略，背後有陰謀。」

睇9．11片段落淚

卿卿更說處決拉登並非萬全之策：「處決咗一個，係咪代表個組織全面瓦解？我相信一定唔會，個組織實有另一個領袖出現，相信會有報復行動，呢點更令我擔心！」她至今仍對9．11事件存有陰霾：「當年呢個大災難對美國人係好大衝擊，我仔女有同學嘅父母當時喺９．11遇襲嘅大廈裏面喪生，心情好悲痛，至今都難以置信，頭兩年情緒好低落。每年美國重播9．11片段，我都睇到喊，真係唔想再有第二次！」愛兒心切的她直言，為慶祝長女Victoria生日及母親節，下周會到曼哈頓看百老匯歌劇：「應承咗個女所以會照去，但會小心啲，唔會去時代廣場附近。」

JC讚完美結局

另外，於美國長大的名模Ana R.，小時曾跟身為美軍的生父四處走而居無定所：「拉登之死，我感受至深，因為美軍同家人終於可以返屋企。」家人現居於美國佛羅里達州的她說：「本來今個月打算返美國探媽咪同Jessica C.（JC），依家要重新考慮，我唔係擔心美國治安，係擔心恐怖分子喺去美國嘅航班發動襲擊，我驚同佢哋一班機！」而在洛杉磯的JC則說：「我同大部分美國人一樣，相信呢個係完美結局，唔擔心喺美國會有恐怖襲擊，保安工夫做得好足。」