政情：郭錦恩自爆20年前「毒禍」
郭錦恩尋日同囡囡Red出席一個活動，示範冰上健康舞。身為三子女之母嘅佢話大仔同女兒較靈活，細仔比較論盡，三人經常打交。
佢笑言：「大仔成日當我係細路，玩到將我掟落梳化，我仲有精力同佢玩，但我年紀都唔細。上星期我見到個BB，我話好得意，囡囡就話媽咪你太老，唔好再生。小朋友又問過我，如果將來佢哋長大，我仲喺唔喺度，原來小朋友對生命有感覺，要珍惜大家嘅關係。我想領養小朋友，但老公覺得壓力大同負擔重。」
提到孫興同莫少聰涉毒，郭錦恩話從未同佢哋合作，但自爆二十年前喺電台講吸毒，被誤會佢鼓吹吸毒而被告，佢話：「我只係想講吸毒有乜後遺症，本來成件事好正面，但可能我冇講清楚啦！」
