政情：何君堯發叔冤家合作？

今日係屯門區議會選新主席，新界鄉議局主席劉皇發尋日現身尖沙咀半島酒店歎茶，但佢嘅茶腳竟然係坊間話一手令佢失去呢個主席位，兼且今日會競逐呢個位嘅屯門鄉委會主席何君堯，係咪好耐人尋味呢？

呢場區會主席戰，手握十三票嘅建仔由現任屯門區會副主席梁健文應戰，如果何君堯得到泛民主派嗰九票，連同鄉事派同其他區議員支持，場仗未必冇得打。就喺呢個時候，何君堯相約發叔同鄉議局當然執委、葵青區會前主席何冬青喺半島歎咗成個鐘頭茶，三人全程一人一句，唔知討論乜嘢大事？發叔喺茶敍後話冇嘢好講即閃，何君堯就話唔關選舉事，佢只係聽發叔分享經驗。傳何君堯想透過發叔游說發叔個仔、屯門區議員劉業強支持，何君堯話絕無其事，但承認佢係對鄉事派有合理期望，如要拉票會親自向劉業強拉咁話，即使請埋冬青叔到場亦唔係搵人幫口，只係大家參詳討論吓啫。

何君堯倡議修章，禁止曾任兩屆鄉委會主席人士連任，令發叔喪失參選資格，連帶屯門區議會主席嘅職位都冇埋，依家佢轉頭又嚟向發叔拉票嘅講法如果屬實，唔通政治真係瞬息萬變到咁？