政情：鬍鬚曾七．一前冇運行

早喺預算案出台時，泛民主派就計劃對財爺鬍鬚曾提不信任動議，但鬍鬚曾使橫手，要求建制派圍堵提出動議辯論檔期，搞到泛民仲未成功提出動議，但如果鬍鬚曾以為可偷雞過關，就未免開心得太早。

立法會秘書處最新嘅文件顯示，十名議員有權優先抽籤提出動議辯論，而七月一日之前，總共有十二次動議辯論機會，泛民成員肯定可以喺香港政治敏感日前夕，對鬍鬚曾提不信任動議，而鬍鬚曾亦難逃被立法會狠批同埋喺七．一大遊行中再被叫下台嘅命運。其實今年七．一係個前所未有嘅政治大炸彈，除咗預算案餘波未了外，啱啱實施嘅最低工資肯定會推高失業率，其他負面影響亦會陸續浮現，七．一就成為最適切嘅民怨爆發點。

有行政會議成員就分析，就係因為最低工資，今年七．一隨時係繼○三年七．一後最多人上街嘅一次，加上區議會選舉臨近，泛民成員必定會大力鼓吹市民上街，如果呢兩個月再有高官激嬲市民，睇怕都到時就神仙難救囉！