政情：張建宗自我催眠

最低工資喺一片爭議聲中尋日正式出台，但因而衍生嘅勞資爭拗嘅問題卻此起彼落。咁都不特止，政府早前大加煙稅，經已推高通脹率，如今政府喺呢個關鍵時刻推最低工資，預計未來數月嘅通脹率只會繼續狂飆，屆時無論中小企定係基層員工都唔會有容易日子過。

依家唔少基層員工都怕因最低工資實施而被裁，中小企僱主則怕計唔掂數，最終要執笠收場。但主事官員、勞工及福利局局長張建宗尋日仲死撐，話依家推最低工資係「生得逢時」，事關家陣經濟環境好，失業率又向下調，飲食業同零售業嘅空缺都比上年同期上升，認為法例實施後都唔會對失業率有重大影響喎。

基層市民生活更苦

查實依家市場最大嘅問題，唔單止係有人冇工做，而係有工冇人做。唔少中小企東主都慨嘆最低工資落實之後，大型連鎖店出嘅工資已追貼佢哋，令求職者寧願去連鎖店打工，搞到佢哋請極都請唔到人。此外，法例實施後，通脹率一定會不斷再升，基層市民生活只會更苦。張建宗就咁睇職位空缺數字上升，就以為冇問題發生，佢一係自我感覺良好，否則就係自我催眠。

自比玩單槓平衡木

佢仲話自己搞完最低工資後，好似做咗個運動員咁，事關佢制訂政策時要平衡各方利益，有如不斷玩單槓平衡木喎。之不過，最低工資一事惹起咁多爭拗，無論針對員工有薪休息日同飯鐘錢嘅安排，抑或係條例其他存在嘅灰色地帶，佢冇一次係正面回應，只識拋番個波畀勞資雙方互相廝殺，早前佢仲畀議員踢爆佢只識用「政策已經最到位」、「大家要實事求是」同「行到呢步已經得來不易」等等嘅口頭禪嚟擋招兼卸膊，睇嚟佢耍太極嘅功夫，遠比玩平衡木好喎！