政情：議事廳放悶彈 釣魚者眾

尋日身處立法會議事廳嘅一眾高官、行會成員同立法會議員，捱咗兩粒鐘聽鬍鬚曾嗰份冇新意嘅預算案，仲慘過上斷頭台，於是各自搵嘢做打發時間。

雖然十二個政策局局長到齊撐鬍鬚曾，但個個都力不從心。教育局局長孫明揚首先棄守，唔夠半粒鐘就開始瞌眼瞓；保安局局長李少光、政制及內地事務局局長「林公公」林瑞麟緊隨其後搵周公去也，林公公仲瞓到冇晒儀態，差啲跣落枱面。

坐喺公眾席嘅行會成員同副局長亦唔好得幾多，梁智鴻托住個頭瞌眼瞓，葉維義就全程玩電腦，其他唔係睇iPad就玩電話，冇乜人有心機聽。

講到瞓得最勁一定唔及班立法會議員。中總代表黃宜弘頻頻打呵欠，進出口界黃定光就先玩電話，之後頂唔順就索性瞓埋。建仔嘅漁農界議員黃容根就係咁同黨友陳克勤傾偈過日辰，醫護界李國麟就喪刨剪報，而其他泛民議員就不停研究用嚟抗議缺乏全民退休保障嘅道具拖鞋同揮春，可見大家都懶理鬍鬚曾嘅預算案。