政情：搞搞政：亂噏鬍鬚曾史上最廢

財爺鬍鬚曾以外行人領導政府財金系統，做得好唔好，有目共睹，任期步入收尾兩年，尋日發表佢任內第四份預算案，充分凸顯佢Hea等收工嘅敷衍塞責心態。預算案全長一百九十三段，表面睇分量唔輕，但睇真啲，當中至少有五十段係廢話，唔係舊酒新瓶、隔夜冷飯炒完又炒，就係一大堆「高、大、空」廢話，論廢嘅程度，堪稱史上最垃圾！

鬍鬚曾早前喺個人網誌寫咗句「大社會」，冇人明佢噏乜，有立法會議員更質疑佢係放煙幕，為早前反駁「官富民窮」嘅言論轉移視線。喺新預算案佢又賣弄自創中文新詞新句式伎倆，講到政府嘅角色又嚟多句「大社會」，佢喺市場同政府關係嘅篇幅話：「喺大市場、小政府之間，香港有一個活躍的大社會。」到底噏乜？

去到結語，鬍鬚曾嚟個總爆發，十段文字全部廢噏，最經典莫過於引述一名詩人話：「偉大的市民成就偉大的城市。」既然鬍鬚曾咁鍾意自創新詞，應該改做：「垃圾的官員組成垃圾政府。」市民一睇就明。