雙重慳Volkswagen Tiguan 1.4 TSI BMT City Explorer

喜歡SUV大大架，又怕佢食油？尤其是四驅版本，老實講喺香港揸SUV，除非你係Off-road玩家，經常攀山涉水，先會堅持要4WD，否則FF先係合理之選，唔講其他，淨係油費都慳番唔少。就以Volkswagen Tiguan 1.4 TSI BMT為例，FF布局之下，綜合耗油量僅7.1L/100km，而且容積只係1,390c.c.，牌費都慳番唔少。

Volkswagen Tiguan 1.4 TSI BMT City Explorer

Tiguan屬於中小型SUV類別，與大型車種相比，分外切合本地彎多路窄嘅交通環境。

雙圈式儀錶板中央設有小屏幕，豐富行車資訊。

合金輪圈改用大咗1"嘅18" New York款式，更有台型。

頭燈改用Bi-Xenon動態轉向燈，醒目晒！

波箱屬於六前速DSG規格，轉波反應夠晒快。

導入了KESSY免匙啟動系統，按下Engine Start-stop鍵即可啟動引擎。

尾燈都升級為LED，燈號分外清晰。

引擎容積只有1.4L，但馬力去到160ps，夠用有餘。

後排椅背可以全數或局部放平，靈活變動載人與置物比例。

大面積天幕覆蓋晒前、後排，人人受惠。

後排空間都算寛敞，高人一族都可就坐。

車廂設計以簡約為主，設備實用不花巧。

Volkswagen HK最近引入嘅Tiguan 1.4 TSI 160ps BMT City Explorer，有齊以上優點外，仲加入唔少專為城巿SUV而設嘅智能設備，包括KESSY免匙啟動系統、Bi-Xenon動態轉向頭燈，加埋全新設計嘅LED尾燈、18" New York合金輪圈、行李箱側窗，以及後窗拆卸式太陽擋套裝，就連性價比都贏埋，冇得輸。

頭尾燈齊齊升格

採用前置引擎、前驅布區（FF）嘅Tiguan 1.4 TSI 160ps BMT City Explorer，其1.4L的雙增壓（Turbo及Supercharged）引擎導入咗BlueMotion技術，馬力及扭力分別達160ps及24.4kgm，力量充沛之餘，引擎Power Band仲相當闊，無論起步及中段加速，都反應爽快。傳動方面，六前速DSG波箱雙離合器自動波箱，轉波快而流暢，而且引擎對應Start-stop系統及煞車能量回收模式（Brake Energy Recover Mode），故此綜合耗油量及二氧化碳排放量可分別低至7.1L/100km及164g/km。

香港唔只市區路面狹窄多彎，仲有起伏不斷嘅羊腸山路，靈巧車身絕對有利。City Explorer嘅車身尺碼跟普通版一樣，車身長、闊度分別只有4,433mm及1,809mm，屬於中小型SUV類別，喺豆腐膶嘅香港使用分外合適。外觀方面，City Explorer嘅頭燈組換成Bi-Xenon動態轉向燈、尾燈亦改用全新設計嘅LED，襯埋一套比標準版大1"嘅18" New York合金輪圈，成個Look當堂Upgrade晒。

體貼購物狂

驚喜之處不只於此，City Explorer仲有KESSY免匙啟動系統，只要系統偵測到車匙喺特定範圍內，上車唔使搵匙窿，亦都唔使撻匙，只需踩住Brake再按Engine Start-stop，即可啟動引擎，方便到極。此外，除咗靠車匙上嘅按鍵，只要身上或手袋袋住車匙，唔使按鍵，走近車門輕拉門柄，已經可以開關車門，最啱Shopping過後兩手拎滿晒戰利品嘅場合。另一方面，為咗增加乘坐舒適性，以及提升私隱度，廠方特別喺行李箱側窗及後窗裝上拆卸式太陽擋套裝，至於覆蓋前、後排嘅巨型天幕，以至泊車感應及疲勞偵測系統（Rest Assit）等設備，就繼續列為標準項目。