樓市出更：新盤大戰來季升級

會德豐地產近年賣樓數量同金額係咁創新高，今年繼續部署開售大批新盤，集團常務董事黃光耀同劉Sir講，呢排正密鑼緊鼓籌備緊啟動今年賣樓攻勢，啱啱仲正式入紙申請將軍澳南唐賢街33號項目嘅預售文件。

呢個盤提供約427伙，分層戶間隔由一房至四房不等，種類多元化，仲有區內罕有洋房，估計今年第四季可以開售。

至於集團今年頭炮盤應該係油塘PENINSULA EAST，黃光耀話，呢個盤嘅預售文件好快到手，屆時會隨即部署推盤，估計下月可以開售，呢個盤提供256伙，間隔由兩房去到四房，將上車換樓客源一網打盡。

悅目收三百票 明發售

除咗上述兩盤之外，會德豐地產今年仲會開售近年山頂區最大規模頂級豪宅新盤Mount Nicholson，呢個盤提供67伙，最快年中開售首批洋房。

同系筲箕灣道163號精品項目提供約177伙，估計下半年登場。

事實上，今個月唔少發展商老友都已經加速趕住推盤，長實積極推售嘅紅磡悅目，明日發售新一批76伙，截至尋晚已經錄到約300張入票。

銷監關注星鑽限時揀樓

另外，一手住宅銷售監管局（銷監局）尋日表明，一直好關注一手住宅物業嘅銷售安排係咪公平合理，仲關注到西營盤星鑽嘅賣方，尋日邀請參與咗市建局專為受該原址重建項目影響嘅前業主，認購該項目指定11個單位，銷售安排寫明要求登記人喺五分鐘內揀選單位。

銷監局話明白市重局或一直有向呢批前業主登記人提供有關可供佢哋認購單位嘅詳細資料，但都唔鼓勵賣方只係畀有關時限揀選單位，因會對佢哋揀樓時造成壓力，當局會同賣方了解情況同作出建議。