Fundman睇市：比亞迪升勢可持續

講開放水，上周五中國公布一月新增貸款數字，創近六年新高，去到1.47萬億元人民幣，較去年十二月的6,973億元人民幣翻一番，亦比預期的1.35萬億元人民幣多。然而，廣義貨幣供應（M2）按年增長僅10.8%，由十二月的12.2%大幅收窄，亦差過市場預期的12.1%，創下一九九六年有紀錄以來最低，一方面是統計基準有所調整，但歸根究底，實體經濟仍疲弱，貨幣乘數效應持續減低。同時，去年十二月地方政府「融資沖量」的後果，使M2增長與新增貸款數字，奇怪的呈一弱一強。無論如何，基於M2失速的風險增加，人行有迫切性持續地推出寬鬆政策，相信下一次降準唔使等幾耐。

內房融資成本高

內地貨幣政策只會愈來愈鬆，唔畀樓價進一步向下亦係預期之內，近期內房接內銀股棒，開始再受基金經理垂青。上周五，華潤置地（01109）升3.7%，世茂房地產（00813）升2.3%，中國海外（00688）升2.1%，萬科企業（02202）升1.4%，可見資金第一輪都主力追發展項目集中於內地一線城市，相對較唔受二三線城市新落成房屋滯銷影響的內房企業。

原先筆者預期，一線內房龍頭資產折讓收窄之後，資金水向低流，會向高負債、項目質素較次的二三線內房股埋手，皆因人行若然減息，可以令佢哋利息開支上直接得益。但睇見上星期，恒大（03333）發債籌117億，票息畀到12厘，負擔比預期高外，亦都唔見得比過去一年融資成本慳到幾多，睇嚟因為減息預期炒高負債內房股，短期會係心理作用大於實際。

汽車股輪流落鑊

最近筆者介紹過唔少高息股，長建（01038）推介後升近一成五，對一隻低beta公用股來說，升勢已經好誇張。另一隻超人系的置富（00778），在長和系重組，未來地產獨立上市後，照道理目前長和各持一半半的項目，注入置富會相對簡單。置富最近宣布十一年來第一次資產套現，以6.48億沽掉盈暉薈，似乎有為將來換貨，預留財政空間做好準備。

最近汽車股表現好番，有跟住消息輪流炒的趨勢。吉汽（00175）一月銷售按年升76%，股價谷番上3.47元的近兩個半月高位，已盡數收復舊年年底因為俄羅斯盧布貶值而出盈警的失地。寶馬宣布今年在華汽車銷售目標升一成六，中國合作夥伴華晨（01114），上周五都炒番上去14.9元。長城汽車（02333）新車款押後消息已被充分消化，市場預期今年係低排放SUV天下，資金又落番去長汽身上，上周五股價見五十二周高位。

仲有冇漏網之魚？諗起去年十二月急跌的比亞迪（01211），上星期發債及出售資產的消息，固然將AH兩邊股價炒到飛起，但就未見提及，一月公司預售一款據稱起步快過「波子」，慳油過豐田混燃車的SUV「唐」，反應仲要非常熱烈，筆者曾經彈過比亞迪的汽車外形欠佳，但睇見今次部「唐」，就覺得個樣靚仔好多，終於同外國對手有「鍊」吓，上周五基金買盤不絕，睇嚟短期應該仲有得上。