Fundman睇市：吉汽可吼位上車

在降準消息刺激下，四大行工（01398）農（01288）中（03988）建（00939）股價升幅介乎1.6至1.9%，美銀美林話未來每降準五十點子，內銀股淨息差會有1至2個基點的好處，盈利增長則稍低於1%，睇落唔算多，不過多少紓緩信貸質素下滑風險，亦預期未來幾年，存款準備金率仲有相當多次的下調可能，不過，美銀美林較傾向睇好內險股，認為有雙位數新業務價值增長外，將會受惠A股狂潮，投資收入有可觀增長，其首選係平保（02318）及中國太保（02601）。

電力股為國捐軀

今年金融市場最熱門話題係貨幣戰爭，在各國央行競相將本身貨幣貶值下，中國終於都無法置身事外，減息後再來降準，睇嚟第三波無可避免，係畀人民幣有秩序的貶值。今年的投資主題，可能係低息口及匯率回落的受益者，內房是筆者第一個想到的選擇，本來高息的電力股都可以諗諗，點不知尋日內地媒體報道，發改委短期可能調低上網電價，達到每千瓦時3分人民幣，相當於6%的減幅。消息比大行估計來得早，幅度亦比預期大，看來只得一個可能，就係阿爺搵電企祭旗，幫手承擔吓社會責任，支持保七大計，亦都幫幫谷極都谷唔起的天然氣發電，等後者產電設備使用率改善。

尋日潤電（00836）跌6.3%，中國電力（02380）、大唐（00991）、華能（00902）及華電（01071）跌幅介乎9.1%至10.4%，先撇除電力股累積升幅唔少，一有風吹草動基金已急急食胡，亦反映中資股票，要揣測阿爺心裏想乜，巨大政策風險下，一切可炒唔可揸的實況。

吉利汽車（00175）收市後公布銷售數據，一月總銷量5.888萬部，按年大升76%，按月有7%升幅。早幾日，摩通分析員試駕吉汽新款GC9後，出報告話對其今年銷售超額完成信心增加，調高今、明兩年盈利預測12至16%，以今年11.5倍PE計出4.3元目標價，評級「增持」，今朝開出升幅唔過分的話，可以留意。

濠賭股仍未見底

中央反貪，內地豪客減少，澳門博彩貴賓房生意大不如前，濠賭股股價已經反映一切，近期又話賭場全面禁煙，真係唔知幾時至跌到底。較意外係一直打着吸引中國豪客旗號，柬埔寨賭業股金界（03918），業績看來所受影響相對輕微。

越南及老撾佔訪柬旅客比重三成，高於中國客佔比的一成三，不及澳門的側重內地客，估計是減低中國經濟因素衝擊的主因。期內盈利跌3%，至1.36億美元，主因係旗下NagaWorld設置的博彩機，一三年獲退還1,500萬美元電子博彩機進場費，一四年再無同類退款。撇除影響，實際有9%增長，期內博彩總收入及貴賓博彩收入，分別升23及41%，大廳賭枱收入則有21%增長。

金界業績同大行預測差無幾，未來業績增長關鍵是佔地12.3萬方米，相當於一期酒店及賭場面積1.5倍的Naga2在一七年投入營運。過去大半年其股價橫行尋底，一來是澳門賭業股的影響，但唔多唔少亦都係基金經理對兩年後新賭場營運，抱觀望態度所致。