Fundman睇市：聯想趁整固吸納

成朝個市都無乜睇頭，魚缸友睇實特首施政報告。房屋政策上，感覺無乜新意思，反而叫停千萬元金融投資就可以移民的捷徑，就更為股場中人關注。

唔少港人只係睇實每日百五、每年五萬四的單程證來港數目，其實經由投資移民這條尊貴通道移居香港的人數唔少，一三年有8,900人，近年唔少本地投資移民顧問及基金管理公司因為咁搵落唔少，依家一夜之間畀人斷米路，都咪話唔突然。據知，近年唔少三四線股，因為這批焗住鎖定七年的「長期投資者」被引導去坐貨而坐到乾晒，等莊家可以輕鬆放紙鳶，這種玩法恐怕因政策有變而告一段落。

渣打（02888）裁員看來是並未令分析員回心轉意，改變對公司淡淡哋的睇法，瑞銀出報告將評級降到落中性，目標價調低一成八至115元，話佢盈利或者見頂，短期業務處轉型期，基本前景唔會有大轉變，亦怕渣打會減少派息，尋日佢股價跌到落108元，再創五十二周低。

雅士利壞消息出盡

雅士利（01230）出盈警，預告去年業績跌四成，主因內地奶粉市場增長放緩，加上蒙牛（02319）入主後重塑銷售渠道及成本費用增加所致，值得留意股價最多跌6.1%，收市倒升兩格收2.3元，一來佢股價由一三年高位5.5元，累積經已跌掉五成八，一四年業績倒退早在市場預期之內，舊年十月至批兩成五新股，每股3.7元引入法國乳品公司達能，眨眼帳面輸三分一，今年蒙牛同達能兩大股東會唔會做番啲嘢，可能性不可抹殺，盈警都出埋，看來逆向思維的炒家趁機買番轉頭，博三月底業績前再無壞消息見光。

小米掌舵人雷軍，近期提到要以超越蘋果公司、三星，目標將小米做到世界第一智能手機公司。毫無疑問，智能手機的普及，逐漸成為個人通訊及資訊獲得的最重要工具，由數字上，也取代了個人電腦的地位。統計機構IDC每季公布的個人電腦付運數字，兩年多前見頂，啱啱對上一季，出貨量又再減少2.4%。

手機股難望有運行

然而，咁係咪代表智能手機股「錢途無限」？睇落又唔多似。小米因為收購美的電器關係，將一三年業績曝光，講到咁兇狠，其實265億人仔生意，都只係賺3.47億人仔，純利率僅1.3%。今年內地N咁多間公司話要開發三至四百元人仔的廉價4G手機，差不多只係舊年年初六分一價錢左右，睇嚟智能手機股難有運行，反而益咗內地三大電訊商可以減少補貼。

做得比人更平更有成本優勢，因此坐擁近兩成PC市場的一哥聯想（00992），在PC界走紅海策略，周不時有新搞作，舊年斥資半百億美金收購摩托羅拉手機及IBM伺服器，有待收成，啱啱外電話佢準備將智能業務「神奇工場」獨立分拆上市，呢間將於今年四月成立的公司，主攻網上銷售智能手機及智能家居產品，高管透露的鴻圖大計，冀望新公司三年內估值達到50億美元。

未開始接獨消費者的公司，創造50億美元價值未算神奇，依家聯想市值都只係150億美元左右，換句話說，呢間橫空出世的神奇工場，未來晒士將等於三分一間聯想，唔係聯想高級副總裁陳旭東肚裏條蟲，真係唔知有乜部署，但未來三幾個月陸續有更多的消息曝光，概念會唔會令母憑子貴，炒起埋聯想，卻是有點期待。睇佢股價由舊年九月的12.64元，因非中資金融股當衰，級級落去到9.68元，近排以旗形姿態在11元樓下整固，似乎有（目及）實必要。