Fundman睇市：越房掂唔過 集資反應未如理想

滿以為內地黃金周假期將至，香港股市會靜靜雞結算，殊不知午市傳出，中證監收市會開記者會送大禮，A股由蟲變龍，狂升2.6%，上番2,056點，港股跟住內地股市出現報復式升市，恒指午後一度抽升超過300點。有趣的是，雖然中證監隨即否認有重大政策發表，但好友一於懶理，恒指收市保持234點升幅，報20,762點，主板成交增至514億元。除咗話基金第三季結前加多兩錢肉緊，粉飾櫥窗之外，實在無第二個更合理理據，支持好友們咁鬼高興。

歐央行無限量買入三年樓下歐債，美國聯儲局亦推QE3掃入MBS（按揭抵押債券），環球經濟即使未見起色，但財金決策人除咗水浸全球之外，仲未諗出更有效的辦法。睇番港股，如果是上兩次QE，基金經理勢必狂隊REITs、公用及高息股，risk on炒番落後價殘的股份，但今次完全唔見咁嘅情況，反而近期一些企業及銀行的高息債券，升幅甚至高於股票，在在反映芬佬眼中，經濟即使離開深切治療部，但距離出院仲有相當漫長嘅日子。

不過，唔係任何高息投資都咁搶手，好似專攻鋁材製品的中國宏橋（01378），周三籌組3億美元債券，出到11厘樓上，最終尋日宣布反應一般告吹。另外，收購廣州IFC文件中，越秀房託（00405）最初希望以不會低於3.56元配股集資，結果前日只能以3.3元定價批股，集資額亦比目標細，只好轉向銀行融資方面打主意，在在反映市場對內地商用物業租務市場，傾向審慎。

昨日越房股價雖然低開高收，接貨者表面勁賺11%，但要留意今次以T+5形式結算，接貨者要等到下月八日先正式收貨，到時乜嘢環境真係睇唔透，無平貨在手，睇怕不宜貿貿然衝入去。

粵投估值唔算貴

有人辭官歸故里，有人漏夜趕科場，剛被高盛剔出確信買入名單的粵投（00270），尋日被美銀美林出報告唱好，認為這隻揸住東江水項目的現金牛，每年坐擁22億自由現金流，加上本身財務桿槓得15%，派息有保證，股價仲未反映收購資產提升收入的可能，目標價睇7.1元。

年初至今，粵投股價累積升幅27%，以綜合預測一三年每股派息20.2仙，股息率3.37厘。睇番○九年至今，粵投歷史股息率在2.5至4.1厘之間徘徊，目前不算太貴，未買不妨等機會，5.8至5.9元會更吸引，至於有貨的，暫時看不到要沽掉的理由。