許廷鏗昨日在活動上與粉絲化身情侶，擺出多個既甜蜜又親密的甫士，更施展Sweet到爆的「壁咚」絕技冧粉絲，令現場氣氛升溫，事後他坦言為粉絲獻出了處男「壁咚」！

粉絲即場為Alfred按摩肩頸，認真貼心！

Alfred笑言「壁咚」女粉絲令他壓力甚大。

Alfred獲粉絲餵食，又收到頸枕禮物。

Alfred擺出各種趣怪表情。

歌手許廷鏗（Alfred）昨日舉行甜蜜拍照會，吸引近百粉絲到場參加。活動上，Alfred與粉絲大玩遊戲，擺出不同甜蜜甫士，勝出的粉絲更可與他上演「壁咚」戲碼，令人羨慕！而當粉絲知道Alfred之前「落枕」，亦送上頸枕及按摩棒等禮物，並即場為他按摩，認真貼心！

出新歌回饋Fans

提到在活動上「壁咚」女粉絲，Alfred笑說：「呢次係我人生第一次，仲要四目交投，唔單只畀人『壁咚』嗰個，其實『壁咚』人嗰個都好大壓力！頭先好緊張，好彩Fans啲反應都好配合！」而他每次出活動都會收到粉絲精心製作的禮物，大讚粉絲相當有心思，又表示會盡快推出新歌回饋大家，並有意推出個人創作大碟：「一直都有諗過，之前出過好幾隻碟，入面都有自己創作嘅歌，諗過可唔可以將啲歌抽出嚟，好似本小說咁，用歌曲包裝，每首歌代表我嗰一個階段，做到好似本自傳咁，會好有紀念價值！」

撐吳若希傻更更

提到好友吳若希被批評在電視節目中經常尖叫，Alfred笑言沒有看過，但不感到意外：「因為佢本身個人好容易覺得神奇，我只會覺得佢係傻更更嘅女仔，大家唔使太在意！（搵你去做？）如果係我都可能差唔多，不過冇佢咁高音！」