顧嘉煇開騷即獲逾十位巨星撐場。
《顧嘉煇榮休盛典演唱會》除掀起歌迷撲飛熱外，演出的十多位天王巨星更鬧出搶歌潮，最終由鄭少秋（秋官）、汪明荃（阿姐）成為「煇歌王、后」爭取到最多曲目。
秋官與阿姐會在煇哥的榮休騷上獻唱經典金曲。
想唱其他歌的仙杜拉笑言丘亞葵「大細超」。
將於5月8日隆重開鑼 的《顧嘉煇榮休盛典演唱會》，十場門票火速被歌迷搶光，據知獻唱的逾十位巨星包括鄭少秋、汪明荃、張敬軒、葉麗儀與謝安琪等，密謀向主辦機構新娛國際負責人丘亞葵（Vigo）打主意，開口要求多唱幾首名曲。
仙杜拉詐嬌
昨日Vigo接受電話訪問時承認收到不少巨星自薦「無限演繹」的意願：「個個都話想多唱幾首金曲，因為秋官、阿姐同煇哥最多合作，所以佢哋唱得最多首。」他又爆料指將專程由加拿大返港撐煇哥的仙杜拉，也越洋致電提出「要求」，他說：「仙杜拉嫌成日唱《啼笑因緣》同《風雲》，想唱其他人嘅歌，我話梗係唔得啦！佢就話咪畀佢唱多幾首囉，我話要『安排吓先』，佢就詐嬌話我大細超。」
製作費倍增
為做到「皆大歡喜」，一次過滿足歌手及歌迷，Vigo指今次製作費倍增：「有啲巨星每晚都唱唔同嘅歌，要重新編曲同加長綵排時間，製作費咪要加囉！」
此外，他更率先爆料指趙增熹、倫永亮及郭偉亮會公開獻技，趙增熹更跟林子祥合作。至於歌迷最關心的加場問題，Vigo說：「考慮再加一至兩場解決缺飛問題，但要視乎批場，亦都得煇哥同歌手同意先考慮。」
音樂組
