連詩雅風光背後 三餐捱麵包

明星藝人在鎂光燈下明艷亮麗，其實台下付出多少，的確是有苦自知。「長腿女神」連詩雅（Shiga）15歲當模特兒行Catwalk，2010年轉行做歌手，有份在電影《喜愛夜蒲》系列中演出，2011年憑該片提名《第31屆香港電影金像獎》最佳新演員，亦在各大音樂頒獎禮上獲得漂亮的成績單。熱愛演藝事業的Shiga在圈中愈行愈順，她坦言去年是豐收年，出碟之餘更「處女下海」參與大型音樂騷。因為捱過苦，所以懂得珍惜。雖然拍完《喜》片後人氣急升，但她表示出道頭兩年冇錢賺，更試過日以繼夜三餐捱麵包。

逼巴士港鐵

Shiga之所以慳家兼住過劏房，皆因當初捱過窮，風光背後有鮮為人知的一面。她指入行後與眾多打工仔一樣做過「月光族」：「頭嗰兩年完全冇賺錢，所以我會特別容易滿足。永遠人哋睇就係最風光，你一個月肯定賺幾廿萬啦！嘩！我都想呀！我試過一日三餐都成問題，你知打工仔月頭最風光，月尾最坎坷，我完全經歷過。」支出要計過度過，就算手上一袋二袋，她都要放下歌手身段，照逼巴士、港鐵，以及三餐以麵包醫肚：「可能去到月尾要計住數，試過一日三餐我淨係食麵包。（入不敷支？）可以咪慳番，食麵包都飽，未必係好好味，起碼唔會餓死先。」

Shiga坦言拍過電影仍要慳住使，最緊要Enjoy自己的事業：「甚至拍完電影都仲未係好維到本，未能維持自己嘅生活，但其實好幸福，餓唔死，做到自己鍾意做嘅嘢。如果唔鍾意，就算餐餐大魚大肉，都冇意思，日日返工，你靈魂唔係跟住你。」度過最艱辛的兩年，終於還清公司債項的Shiga自言搣甩負資產重見光明：「以前借公司錢，還咗錢嗰一刻係人生轉捩點，好似負資產嘅人，突然變正資產，好大喜悅。還晒錢頭一、兩個月都要慳，唔再借錢，我賺幾多袋幾多，慢慢儲。我一向唔大使，依家亦唔使捱麵包。」

問朋友借錢

單親家庭長大的她更相當顧家，父母離婚後就獨力賺錢，從未用過媽媽的一分一毫，自己打工賺零用錢：「媽咪比較大年紀，佢40歲生我，其實自從單親咗，媽咪更加辛苦，我冇開口問過佢攞錢，冇晒錢，自己諗辦法，打工、問朋友借都唔會問佢攞，唔想佢擔心，有啲咩自己搞掂。」目標明確的Shiga最想媽媽退休，自己孭起養家的責任。

問到是否愛情事業兩得意，去年年底大方承認與圈外有米男友Anthony蜜運的Shiga笑說：「OK嘅，生活上好多嘢漸漸好，工作上可以好好多，好多嘢想做到。」而身為歌手的她坦言想低調處理感情事及私生活，更希望保護身邊人，問到對男朋友大壓力？她說：「都係，對身邊所有唔係行內人，盡量想保護佢哋。我連同啲女仔出街，有時佢哋都唔舒服，最難頂係我永遠都唔可以約實，唔知幾時放假，冇乜剩幾多朋友。」