SUN微博：打橫嚟講：有僭建，等天收

在香港，一個有關「非法僭建」的審判，於二○一二年十二月十日進行了，讓香港人看到違法者「目無法紀」，不理屋宇署發出的清拆令，甚至不聞不問，並狡辯話「政府一直沒執法，是『默許』僭建物存在」云云，最終，被裁判官直斥其非，罰款兼要即時拆除僭建物，否則，不排除再檢控，可監禁一年及罰款二十萬元，若再三唔理會，即持續違法，加監之外，更要加判每日罰款兩萬大元。

我講緊的「非法僭建」案，係上水金錢村有兩甥舅，在已有三層高的一幢村屋上，違法加建多一層，二○○九年屋宇署已發清拆令，被告亦承認有收到有關令狀，和明白當中內容，但偏偏就是一直無行動，更辯稱「清拆令牴觸《基本法》保護新界原居民合法傳統權益」，不知是有心抵賴搞對抗，或是無知，有如裁判官話齋「道聽途說」？

官說，雖然《基本法》沒有列明建築物高度及面積限制，但不表示任起的：「難道可以興建摩天大廈？」都幾有邏輯，好發人深省，令人拍掌稱慶，叫那些有非法僭建物的「被告疑犯」，咪以為鬼祟未被人告，就可以偷雞過骨；已被人揭發者，就應好拿拿臨處理好去，勿諗住再以為狡辯，便可蒙混過關，世界怎有咁便宜之事！

那金錢村違法者被判刑後，心有不甘，在法庭外申說：「上至達官貴人、特首都係咁，點解我要罰咁多錢？」真荒謬，你犯法就係犯法，做乜要拉人落水？係，曾蔭權係有僭建呀！咪等緊天收囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

email：sunweibo@opg.com.hk

「就係咁爆」網址：tv.on.cc/hot